Date of Publish : 26 September 2026, 1:59 pm
Editor : Janapati Venkata Ramesh Babu
సామాజిక అభివృద్ధికి ప్రాధాన్యం
- ప్రజల అవసరాలకు అనుగుణంగా మౌలిక వసతుల కల్పన
- భూమిపూజ, ప్రారంభ కార్యక్రమాల్లో ఎమ్మెల్యే కందికుంట వెంకటప్రసాద్ కదిరి, సెప్టెంబరు 26: ప్రజల అవసరాలకు అనుగుణంగా మౌలిక వసతులు కల్పించి, సామాజిక అభివృద్ధికి బాటలు వేయడమే కూటమి ప్రభుత్వ లక్ష్యమని కదిరి ఎమ్మెల్యే కందికుంట వెంకటప్రసాద్ అన్నారు. కదిరి మున్సిపాలిటీ పరిధిలోని 35వ వార్డు ఎర్రగుంట్లపల్లి, 6వ వార్డుల్లో శనివారం పలు అభివృద్ధి కార్యక్రమాల్లో ఆయన పాల్గొన్నారు. ఈ సందర్భంగా రూ.1.24 కోట్లతో నిర్మించిన బీటీ రహదారిని ప్రారంభించారు. అలాగే ఎస్సీసీఎస్పీ నిధులతో చేపట్టనున్న సీసీ రోడ్లు, డ్రైనేజీ పనులకు భూమిపూజ చేశారు.
రూ.1.24 కోట్లతో బీటీ రోడ్డు
ఎర్రగుంట్లపల్లిలో బీటీ రహదారి నిర్మాణాన్ని గత వైసీపీ ప్రభుత్వం పట్టించుకోలేదని ఎమ్మెల్యే పేర్కొన్నారు. కూటమి ప్రభుత్వం అధికారంలోకి వచ్చిన అనంతరం ప్రజల సమస్యను గుర్తించి రూ.1.24 కోట్లతో రహదారి నిర్మాణ పనులు పూర్తి చేసినట్లు తెలిపారు. దీంతో స్థానిక ప్రజల రాకపోకలకు ఇబ్బందులు తొలగుతాయని చెప్పారు.
సీసీ రోడ్లు, డ్రైనేజీకి శ్రీకారం
పట్టణంలో 6వ వార్డు పరిధిలోని కందికుంట నారాయణమ్మ కాలనీ, అమీర్నగర్ ప్రాంతాల్లో ఎస్సీసీఎస్పీ నిధులతో చేపట్టనున్న సీసీ రోడ్లు, డ్రైనేజీ నిర్మాణ పనులకు ఎమ్మెల్యే భూమిపూజ చేశారు. ప్రజల అవసరాలను ముందుగానే గుర్తించి మౌలిక వసతులు కల్పించేందుకు ప్రభుత్వం ప్రాధాన్యం ఇస్తోందన్నారు.
విస్తరణ పనులు ఆగవు
కదిరి పట్టణంలో రోడ్డు విస్తరణ పనులను పూర్తి చేస్తామని ఎమ్మెల్యే స్పష్టం చేశారు. స్థానిక ఎన్నికలను దృష్టిలో ఉంచుకుని అభివృద్ధి పనులను నిలిపివేసే ప్రసక్తే లేదన్నారు. ప్రజలు దీర్ఘకాలంగా ఎదురుచూస్తున్న చౌక్బజార్, ఇక్బాల్ రోడ్డు విస్తరణ పనులను చేపట్టి విశాలమైన రహదారులను అందుబాటులోకి తెస్తామని తెలిపారు.
తిరువీధుల విస్తరణలో ప్రజల ప్రయోజనాలను దృష్టిలో ఉంచుకొని
చట్టబద్ధంగా పరిహారం చెల్లించి, ప్రజలతో చర్చించి నిర్మాణ పనులు చేపడతామని ఎమ్మెల్యే పేర్కొన్నారు.
కార్యక్రమాల్లో పట్టణ అధ్యక్షుడు డైమండ్ ఇర్ఫాన్, స్వచ్ఛ ఆంధ్ర డైరెక్టర్ పర్వీన్ భాను, మాజీ కౌన్సిలర్ ఆల్ఫా ముస్తఫా, రంగారెడ్డి, మహమ్మద్, 35వ వార్డు ఇన్ఛార్జి రాజేంద్రనాయుడు, 6వ వార్డు ఇన్ఛార్జి చైతన్య, శేషు, సోము తదితర నాయకులు, కార్యకర్తలు పాల్గొన్నారు.
All Rights Reserved By Amaravathi Velugu.
Save