• పిల్లలను ఆన్‌లైన్ ప్రమాదాల నుంచి రక్షించాలంటూ పిటిషన్
• సోషల్ మీడియా వినియోగానికి వయోపరిమితి, వయసు నిర్ధారణ ఉండాలని విజ్ఞప్తి
• సైబర్ వేధింపులు, హానికర కంటెంట్‌పై ఆందోళన
• తదుపరి విచారణ డిసెంబర్ 3కు వాయిదా
• సోషల్ మీడియా వేదికల వల్ల పిల్లలు

 ఎదుర్కొంటున్న ప్రమాదాల నుంచి వారిని రక్షించేందుకు పటిష్ఠమైన నియంత్రణ వ్యవస్థను ఏర్పాటు చేయాలని కోరుతూ దాఖలైన పిటిషన్‌పై సుప్రీంకోర్టు స్పందించింది. ఈ అంశంపై కేంద్ర ప్రభుత్వానికి నోటీసులు జారీ చేసింది. ప్రధాన న్యాయమూర్తి జస్టిస్ సూర్యకాంత్, జస్టిస్ జాయ్ మాల్యా బాగ్చీలతో కూడిన ధర్మాసనం ఈ పిటిషన్‌ను విచారించింది.

ది ఎమరాల్డ్ హైట్స్ ఇంటర్నేషనల్ స్కూల్, దాని డైరెక్టర్ సిద్ధార్థ్ సింగ్ గిర్నార్ ఈ పిటిషన్‌ను దాఖలు చేశారు. సోషల్ మీడియా వినియోగానికి కనీస వయసు నిబంధనలు, వయసును నిర్ధారించే విధానం, ఆన్‌లైన్ వేధింపుల నుంచి పిల్లలను రక్షించే మార్గదర్శకాలు రూపొందించాలని కోరారు. ప్రస్తుత సోషల్ మీడియా సంస్థలు అమలు చేస్తున్న 13 ఏళ్ల కనీస వయోపరిమితి స్వీయ ధృవీకరణపై ఆధారపడటం వల్ల తగిన రక్షణ లభించడం లేదని పిటిషనర్లు వాదించారు. పిల్లల వ్యక్తిగత సమాచార రక్షణ, తల్లిదండ్రుల అనుమతి, లక్షిత ప్రకటనలపై పరిమితులు వంటి అంశాలపైనా స్పష్టమైన విధానం అవసరమని పేర్కొన్నారు.

సైబర్‌బుల్లీయింగ్, ఆన్‌లైన్ వేధింపులు, హానికర కంటెంట్, అపరిచితుల నుంచి ఎదురయ్యే ప్రమాదాలతో పిల్లల భద్రతకు ముప్పు ఏర్పడుతోందని పిటిషనర్లు ఆందోళన వ్యక్తం చేశారు. సోషల్ మీడియా అధిక వినియోగం వల్ల నిద్రలేమి, ఏకాగ్రత తగ్గడం, ఆందోళన, చదువుపై ప్రభావం వంటి సమస్యలు తలెత్తుతున్నాయని తెలిపారు. పిల్లల ఖాతాలకు మెరుగైన ప్రైవసీ సెట్టింగ్‌లు, వయసుకు తగిన యాక్సెస్ నియంత్రణలు, సోషల్ మీడియా సంస్థల జవాబుదారీతనం ఉండేలా మార్గదర్శకాలు జారీ చేయాలని కోర్టును కోరారు. ఈ పిటిషన్‌ను ఇదే అంశంపై పెండింగ్‌లో ఉన్న మరో కేసుతో జతచేసిన ధర్మాసనం తదుపరి విచారణను డిసెంబర్ 3వ తేదీకి వాయిదా వేసింది.