స్థానిక ఎన్నికల వాయిదా.. ఈసీ నిర్ణయాన్ని గౌరవిస్తామన్న అధికార కూటమి

ఆంధ్రప్రదేశ్‌లో పట్టణ స్థానిక సంస్థల ఎన్నికల ప్రక్రియను తాత్కాలికంగా నిలిపివేస్తూ రాష్ట్ర ఎన్నికల సంఘం తీసుకున్న నిర్ణయానికి కట్టుబడి ఉంటామని అధికార కూటమి పార్టీలు ప్రకటించాయి. ఈసీ ఏ నిర్ణయం తీసుకున్నా గౌరవిస్తామని స్పష్టం చేశాయి.

ఈ మేరకు ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్, బీజేపీ రాష్ట్ర అధ్యక్షుడు మాధవ్ పేర్లతో బుధవారం ఓ సంయుక్త ప్రకటన విడుదలైంది. కుట్రల ద్వారా ఎన్నికలను అడ్డుకోవడమే లక్ష్యంగా వైసీపీ పనిచేస్తోందని ఈ ప్రకటనలో కూటమి పార్టీలు తీవ్రంగా ఆరోపించాయి. రాష్ట్రానికి కేంద్ర నిధులు సకాలంలో అందాలన్నా, అభివృద్ధి పనులు ముందుకు సాగాలన్నా ఎన్నికలు గడువులోగా పూర్తి చేయాలని తాము భావించినట్లు తెలిపాయి.

ప్రజా సంక్షేమం, రాష్ట్ర అభివృద్ధిపై వైసీపీకి ఏమాత్రం బాధ్యత లేదని, మొదటి నుంచీ స్థానిక ఎన్నికలను అడ్డుకునేందుకే ప్రయత్నిస్తోందని విమర్శించాయి. ఎన్నికలను నిలిపివేయడం కోసం వైసీపీ ఏకంగా 59 పిటిషన్లను కోర్టులలో దాఖలు చేసిందని, ఆ అడ్డంకులు తొలగి ఎన్నికల ప్రక్రియ మొదలయ్యే సమయంలో హింసను ప్రేరేపించిందని ఆరోపించాయి.

ఎన్నికలు పారదర్శకంగా, ప్రశాంత వాతావరణంలో, నిజాయతీగా జరగాలన్నదే తమ లక్ష్యమని, ఈ ప్రక్రియకు పూర్తి మద్దతు ఇస్తామని కూటమి పునరుద్ఘాటించింది. రాజ్యాంగబద్ధంగా ఎన్నికలు జరిగి, సమర్థులైన నాయకులు ఎన్నికై, కూటమి ప్రభుత్వ ఫలాలు ప్రతి ఇంటికీ అందాలని ఆకాంక్షిస్తున్నట్లు ఆ ప్రకటనలో పేర్కొన్నాయి.

ఇదీ చదవండి :: పార్కు స్థలాన్ని ఆక్రమించిన వ్యక్తికి టీడీపీ టికెట్ ఇచ్చారు...