సింగరేణి ప్రైవేటీకరణ ఉండదు.. మంత్రి శ్రీధర్‌బాబు స్పష్టీకరణ

సింగరేణి సంస్థను ప్రైవేటీకరించే ఆలోచన తమ ప్రభుత్వానికి లేదని రాష్ట్ర మంత్రి శ్రీధర్‌బాబు స్పష్టం చేశారు. సింగరేణిని ప్రైవేటు వ్యక్తులకు అప్పగిస్తున్నారంటూ ప్రతిపక్షాలు చేస్తున్న ఆరోపణల్లో వాస్తవం లేదని కొట్టిపారేశారు. సింగరేణి భవిష్యత్తుపై కార్మికులు, ప్రజలు ఆందోళన చెందాల్సిన అవసరం లేదని భరోసా ఇచ్చారు. సీఎల్పీ కార్యాలయంలో నిర్వహించిన మీడియా సమావేశంలో ఆయన ఈ వ్యాఖ్యలు చేశారు.

గత బీఆర్ఎస్ ప్రభుత్వ పాలనపై శ్రీధర్‌బాబు తీవ్ర విమర్శలు చేశారు. పదేళ్ల పాలనలో సింగరేణిని కేసీఆర్ కుటుంబం సొంత సంస్థలా మార్చుకుందని ఆరోపించారు. కార్మికులు అనేక ఇబ్బందులు ఎదుర్కొన్నారని, సంస్థకు భారీగా బకాయిలు మిగిల్చి ఆర్థికంగా నష్టపరిచారని విమర్శించారు. గతంలో సంస్థను నిర్వీర్యం చేసిన నాయకులు ఇప్పుడు కార్మికుల సంక్షేమం గురించి మాట్లాడటం విడ్డూరంగా ఉందని వ్యాఖ్యానించారు.

సింగరేణి ప్రతిష్ఠను దెబ్బతీసేలా బీఆర్ఎస్ నేతలు ఆధారాలు లేని ఆరోపణలు చేస్తున్నారని మంత్రి మండిపడ్డారు. ప్రజలు, కార్మికులు అసత్య ప్రచారాలను నమ్మవద్దని సూచించారు. గతంలో కాంగ్రెస్ ప్రభుత్వమే సింగరేణిని కాపాడిందని, ప్రస్తుతం కూడా సంస్థ ప్రయోజనాలను పరిరక్షించేందుకు తమ ప్రభుత్వం కట్టుబడి ఉందని స్పష్టం చేశారు. యాదాద్రి థర్మల్ పవర్ ప్లాంట్‌ను పూర్తి స్థాయిలో నడిపిస్తామని హామీ ఇచ్చారు.

ఇదీ చదవండి :: పార్కు స్థలాన్ని ఆక్రమించిన వ్యక్తికి టీడీపీ టికెట్ ఇచ్చారు...